2024年開始，神州好似都係冇乜邊個行業特別好做，行行都話有競爭，好似無咩板塊係贏梗。近期直播都有一番龍爭虎鬥，話係直播界，但背後就係電商界嘅更高層次競爭。面對人人爭住做直播電商嘅格局，京東(09618)決定連老闆劉強東都要下海做直播。
就喺早兩日，京東搞咗場劉強東親自直播，但竟然唔用真身上場，而係「A貨」，係「AI貨」，京東用自行研發嘅AI大模型「言犀」生成出嚟嘅AI版劉強東。雖然最後劉老闆無真係上場，但AI劉強東依然吸引好多網友入去望望，始終都算係全網第一個AI直播主，一個鐘就已經吸引2000萬人次收睇。
老實講，京東呢次第一個AI直播主持，都幾交到功課，雖然好仔細睇都仲會發現手部動作郁得唔太自然，面部表情有輕微木獨，但唔講嘅話可能頭一分鐘都未必發現到，像真度一定超過九成半。直播帶貨最緊要係帶到貨，而喺語言上已經接近100分，語氣、語調、語速都同真人一樣，唔睇齋聽真係會覺得就係劉強東直播緊。
對於「AI貨」東哥，大部分觀眾都不得不讚嘆AI強大，但都有人覺得既然係老闆開播嘅處男作，就用AI嚟耍網友，似乎就唔係好夠誠意。老闆直播處男作，雖然係用劉強東親自上陣作為主打，但京東今次明顯志不在老闆首show，而係旗下「言犀」AI嘅首show。上年ChatGPT登場令各大科技股都爭住開發AI，當時京東就宣布開發「言犀」，當時孖屐覺得，京東比起其他科技股少啲創科元素，跟風開發都唔會揪得過百度(09888)同巴巴(09988)。但一年幾之後「言犀」終於有代表作出場，完美複製一個劉強東，結果出嚟評價都唔算好差。
但由言犀開始研發至今已經有大約一年時間，要生成嘅係劉強東，京東自然有大把素材可以畀言犀不停學習再學習，生成質素自然高。但如果要複製其他人物，甚至係生成一個虛擬人物，像真度有無AI劉強東咁高就仍然有疑問。京東比起其他電商平台，一直都欠缺一個現象級主播，如今用上AI直播主，即係京東未來將會向著虛擬直播進發，請請！
*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。
etnet榮獲HKEX Awards 2023 「最佳表現證券數據供應商」大獎► 了解詳情
